قصائد مكتوبه من شريط 14 نور لباسم الكربلائي

[b][center]اللهم صل على محمد وال محمد

.. هذا إسمك حسين ..


هذا إسمك حسين شمعة بدروبنا
وإحنا المحبين وإنت محبوبنا
عنوانك ورقم السكن ساكن گلوبنا

الوادم ينشدون - عنك يسألون - وإسمك نطيته
گلت إلهم حسين - هذا الإسم وين - بگلبي خطيته
عن إليحسدون - وعن كل العيون - حبك خفيته
خلهم يغارون - بيك آنه مجنون - لعگلي جنيته
يل عشنه وياك وإنت ويانه - بارينه سماك ثاني ريحانه
هذا الإسم طول الزمن ساكن گلوبنه

ساكن بالگلوب - يا أغلى محبوب - مالك إحساسي
رغم إليعذلون - هذا إنت مقرون - ويا أنفاسي
وبكل الأحوال - حبك على البال - لحظة ما ناسي
هذا العشگ تاج - للدنيا وهاج - يسطع براسي
يا أغلى إنسان بإسمك نفاخر - وكتبنا عنوان حبك الطاهر
يا إبن الأمين المؤتمن ساكن گلوبنه

گلب المحب دار - ورقم السكن صار - نورك الخامس
گلبي إنغرم بيك - لو ما يكفيك - ما أظل يائس
أفتح لك العين - وإسكنها يا حسين - والجفن حارس
بحبك مجانين - وبهالملايين - چم وچم عابس
إفتح الأجفان وإسكن بعيني - ما أبني جدران بينك وبيني
هذا إنت بالسر والعلن ساكن گلوبنه

لا تحسب حساب - ما بالگلب باب - إدخل بكيفك
ولگلبي لو جيت - يا صاحب البيت - أنحسب ضيفك
عذالي يدرون - برموش العيون - مرتسم طيفك
هيمني ذكراك - ما لحظة تنساك - روحي وتعيفك
يا بدر الأطياب يزهي منهاجك - مثل الهوى الهاب روحي تحتاجك
ما ساكن بجنة عدن ساكن گلوبنه

وبروحي يا حسين - مجموعة ضدين - وإكشف أسراري
رغم إليضدوك - بگلب إليعادوك - وجرت ناري
دلالي رضوان - ورموشي أغصان - جنة الباري
فردوسك العين - بعيوني نهرين - مو نهر جاري
بروح المحب فوت يل عشت بيها - وبساعة الموت إنت تحييها
حبك وروحك والبدن ساكن گلوبنه

يا مالك الروح - عن عيني ما تروح - نجمة طيوفك
تملك كرامات - بأفق السماوات - خطوا حروفك
يا نجمة سهيل - وبهدوة الليل - ساهر نشوفك
ورحمة الإيمان - سيد وخسران - كل من يعوفك
يل مولدك عيد فرحة الشيعة - ونمد لك الايد نجدد البيعة
يا غالي وأغلى كل ثمن ساكن گلوبنه
....................................................................

بسم الله الرحمن الرحيم

اللهم صل على محمد وال محمد

.. موال ..



أرباطعش نور بالحق غيرهم ما إلنه
بالمصطفى او فاطمة او حامي الحمة ملنه
والحسن وحسين عنهم لا تظن مِلنه
زين العباد الذي شرع نهج جَدَه
او باقر علوم النبي بحر الكرم جده
جعفر الصادق مثلهم للعهد جده
من كاظم الغيظ إكسب يا الموالي عِلِم
والرضا وإبنه الجواد أصبحوا نور ابَعَلَم
والهادي والعسكري للدين رفعوا علم
هالعلم ظل ينتظر چف الذي ينشره
راعيي غايب او هجره للگلب ينشره
والله والله لو وكت الفرج ينشره
نشريه بأرواحنه او أولادنه او أملنه
..........................................................
بسم الله الرحمن الرحيم

اللهم صل على محمد وال محمد

.. إبن محبوبي ..



إبن محبوبي او حبيبي الأولي - علي وإسمه من إسم جده علي
يسوى كل إخوتي وأصحابي او هلي - علي وإسمه من إسم جده علي

علي الأكبر هام كل من شافه - يشبه أوصاف النبي ابأوصافه
إنولد والبسمات فوگ اشفافه - إله حواجب ترهب السيافة
گلبي هام ابسيرته او ما عافه - عاشگ او گلبي ابغرامه مبتلي

فرع من هاشم او أصله غالبي - تغار من لفتاته لفتات الظبي
لو ينشدوني او يگلولي اشتبي - علي الأكبر هوه روحي او مطلبي
ابعينه عودة إلما يصلي اعلى النبي - او خلي صوتك مثل صوتي يعتلي

إنولد چن إنولد جده المصطفى - حاوي من جده محمد كل صفة
ابكثر ما يملك جمال او معرفة - خجل منه البدر من شافه إختفى
علي الأكبر مركز الحب والوفى - او لو سمعت ابإسمه همي ينجلي

إلدار الحسين إنفتح درب الهوى - جينه آنه والعشگ نمشي سوى
الأكبر ابمهده او تغشاني الضوى - شوفته صارت لعد جرحي دوى
نبع شوگي او منه دلالي إرتوى - علي الأكبر صار بالحب منهلي

حان ليل الشوگ وآنه اعلى الوعد - جيت او أتغنى ابلحن طير السعد
علي الأكبر شبل الحسين إنولد - إبن محبوبي إلعشگته للأبد
ابهالمحبة كل عضو ابجسمي شهد - ضوى عيوني او شمعة تضوي ابمنزلي

علي او ما يحلى مثل هذا الإسم - ابكل گلب عاشگ ترك صورة او رسم
هالإسم لأهل المحبة ظل يسم - او لون ما هالإسم ما هب النسم
او لا شمس دنيانه تضوي او تبتسم - غير هذا الإسم ما يحلى إلي

ابهالشكل ليلتنه عشناها ابهنى - انغني للأكبر ابألحان المنى
إلك أحچي عن دليلي او بينه - ابحب أهل بيت النبي ايجوز الغنى
ليلة هذه اتمر علينه ابكل سنة - إخذي يا عيني سهر واتدللي
.............................................................................

بسم الله الرحمن الرحيم

اللهم صل على محمد وال محمد

.. إفرح يا المحب ..



إفرح يا المحب إفرح يا مولانه - أمتنه بعلي السجاد فرحانة
او كل عترة محمد حاضرة اويانه

إسمع صوت باسم خادم المنبر - يروي لك رواية او جابر المصدر
هذا اليوم أشرف حدث يتقرر - والكون ابعلي السجاد يتنور
لا تسألني منهو ابهالحفل يحضر - حضروا فاطمة او جده النبي او حيدر
هالأشعار تعجز توصف المنظر - وحروف القوافي كلها خجلانة

بأمواج العواطف غرگت الأفكار - خجلانة القوافي او عجزت الأشعار
لا تلوم الفكر لو شفته ظل محتار - چن عيني تشوف ابعالم الأسرار
بالمجلس اويانه حاضر المختار - او جالس عن يمينه المرتضى الكرار
جلست عن يساره جدة الأطهار - بنته الزهرة بالألطاف ترعانه

إسمع يا المحب من گبل لا تسأل - حتى الحسن هم حاضر ابهالمحفل
چن عيني لبو السجاد تتمثل - حاضر حفلة إبنه او وجهه يتبهلل
حفلتنه زهية ابعترة المرسل - چنها اشموس تزهي او عيني تتأمل
هالعترة مدحها المصحف المنزل - او ذاكرها الإله ابسور قرآنه

هذا مولد السجاد ننتظره - يا المؤمن او إنت ابواجبك أدرى
شارك بالفرح هادينه والعترة - أولها إلمحمد قدم البشرى
او للكرار بعده وجه النظرة - گله شيعتك هالليلة مبتشرة
او قدم هالتهاني إلفاطمة الزهرة - گلها الشيعة كلها اليوم نشوانة

هاي الفرحة شملت مجمل الأمة - كلها ابمولد السجاد مبتسمة
قدمنه التهاني للحسن عمه - وعقدنه المحافل بإسم أبو اليمة
هالليلة ولادة سادس العصمة - گلب احسين أبوه إنزال كل همه
گالوا شسمه جاوبهم علي إسمه - علي السجاد إسمه او هذا عنوانه

أروي لك رواية والخبر مسنود - بكتاب البحار اتشهاده موجود
گال حسين لو عندي ألف مولود - كلهم أسميهم علي ابإسم العود
هذا الإسم خصه الخالق المعبود - وبؤوج المعالي هالإسم مشهود
چفك يا علي السجاد بحر الجود - يل إسمك علي او هالإسم بدمانه

إسمك يا علي بلسم يداوينه - نهتف يا علي لآخر نفس بينه
جدك علي إلناصر دين هادينه - وإنت وارث إسمه او كل مضامينه
فضلك يا علي السجاد يكفينه - يا عابد إلكل عابد صرت دينه
نختمها ابدعاء او نرفع ايدينه - يرزقنه شفاعة علي وإحسانه
.............................................................................

بسم الله الرحمن الرحيم

اللهم صل على محمد وال محمد

.. أيَتُها السَيِدَةُ الجَليلَة ..



أيَتُها السَيِدَةُ الجَليلة - زَهراءُ يا زَهراءُ يا أصيلَة
أنتِ إلى اللهِ لَنا وَسيلَة

من عالم الذر چانت البداية - واتفتحت بوابة الهداية
أسأل چنت وأستفسر الخفاية - بيمن ألوذ او أضمن النهاية
گالوا ولاء أم الحسن كفاية - هالطاهرة اتضونك عن الخطاية
وَها أنا بِالحُبِ وَالوَلاءِ - أرضَيتُ رَبَ الأرضِ وَالسَماءِ
إذ كُنتِ أنتِ لِلهُدى سَبيلَه - أنتِ إلى اللهِ لَنا وَسيلَة

الخالق جمعنه ابحضرة المعالي - او كل الخليقة تستمع مقالي
لآدم أبويه وجهت سؤالي - ناديته إلمن بالبشر أوالي
وصاني بيچ او أصبحت موالي - وبهالوصية حققت منالي
مِن آدَمٍ مِن والِدي وَصِيَةَ - قالَ إعتَصِم بالِبَضعَةِ الزَكِيَة
وَهذهِ عُدَت لَنا فَضيلَة - أنتِ إلى اللهِ لَنا وَسيلَة

او ثاني وصية تنجعل كرامة - نوح النبي اتوجه إلي ابكلامه
ناداني هذه ابجبهتك علامة - إنت الموالي إليحفظ إلتزامه
الزهرة السفينة ابمحور الإمامة - هي النجاة إلمرفئ السلامة
قالَ إعتَصِم بِهذهِ السَفينَة - تَأتي إلى السَواحِلِ الأمينَة
أصبَحتِ بِالفوَزِ لَنا كَفيلَة - أنتِ إلى اللهِ لَنا وَسيلَة

او ثالث وصية واضحة او صريحة - من مهجة إبراهيم إجت نصيحة
گال إتبع المناهج الصحيحة - درب البيلغة العالمة الفصيحة
هالزهرة بركان الهضم تزيحه - او برد او سلم يصبح إلك لفيحه
قَد خُصَ إبراهيمُ عَن سِواهُ - خَليلَ رَبي خَصَهُ الإلهُ
وَأنتِ يا فاطِمَةٌ خَليلَة - أنتِ إلى اللهِ لَنا وَسيلَة

ما من رسول إتوجه ابرسالة - إلا او يبلغ گومه بالعدالة
وإحنه الإله ابمصحف الجلالة - وصانه وإحنه ناخذ ابمقاله
گال العبد ما تكتمل خصاله - إلا ابذوي القربى أجل سلالة
زَهراءُ يا مَملَكَةَ البَهاءِ - يا مَعدَنَ العِفَةِ وَالحَياءِ
ها نَحنُ في ظِلالِكِ الظَليلَة - أنتِ إلى اللهِ لَنا وَسيلَة

رب العرش لمن بعث نبيه - خير الخليقة او أشرف البرية
أوحى له من عرشي إلك هدية - هاي البتول الطاهرة الزكية
والهادي إلنه وجه الوصية - وإحنه إلتزمنه ابخالص السجية
وَهكَذا جاءَ عَن الرَسولِ - أُوصيكُمُ بِالبَضعَةِ البَتولِ
يا مَن غَدَوتِ لِلهُدى دَليلَه - أنتِ إلى اللهِ لَنا وَسيلَة

يا الزهرة بيكم تكمل الديانة - وإحنه ابهدايتكم ثبت هدانه
راعي العهد صاح او هتف لسانه - شيعتك إحنه او نحفظ الأمانة
عهد الولاية اموقع ابدمانه - او إلنه الخلود اتفتحت جنانه
زَهراءُ في وِلائكُم شَمائل - كَأنَها الجَنَةُ وَالخَمائل
شَمَمتُها خَميلَةً خَميلَة - أنتِ إلى اللهِ لَنا وَسيلَة
....................................................................

بسم الله الرحمن الرحيم

اللهم صل على محمد وال محمد

.. رب العلى إختاره ..



رب العلى إختاره - ما نعرف أسراره

چلمة علي إلدرب العدل تهدينه - يوم الشدد من كل شدد يحمينه
منهو إلحفظ نهج الرسول او دينه - منهو الخليفة من بعد هادينه
اشما ندرس أفكاره - ما نعرف أسراره

بيمن غدى ايصدح هزار الوادي - إلمن نحب آنه او هلي وأجدادي
وإنت يا مسلم بالشدد شتنادي - منهو الذي بات ابمكان الهادي
هذا إلحفظ جاره - ما نعرف أسراره

نحچي الحقيقة او هذا بيني او بينك - إنت يا مؤمن منهو گرة عينك
منهو الذي ثبت قواعد دينك - منهو الذي نور ظلام اسنينك
اشما تسطع أنواره - ما نعرف أسراره

ابوقعة بدر منهو إلتزم بالراية - منهو إلي حقق للرسول الغاية
وبهالأتى عليمن تشير الآية - منهو إلي چفه للكرم عطاية
ما نشفت أنهاره - ما نعرف أسراره

يا فارس ابكل الحروب انشوفه - او ياهو إلقلع باب الكفر بچفوفه
يا بطل صولاته غدت معروفة - منهو الذي لو ننذبح ما نعوفه
اشما نتبع آثاره - ما نعرف أسراره

بيمن زهت شمس الديانة او لاحت - وأزهار جنة عدن بيمن فاحت
منهو إلجلى اغيوم الشدد وإنزاحت - وأمك او أمي بالولادة اشصاحت
وعرفنه أدواره - ما نعرف أسراره

زينة مجالسنه او حفلنه الزاهر - أول إمام او إحنه بيه انفاخر
من كل دنس طهرنه حبه الطاهر - شيعتك إحنه او نلتزم للآخر
من تنزل أستاره - ما نعرف أسراره

..........................................................................
بسم الله الرحمن الرحيم

اللهم صل على محمد وال محمد

.. علي يا أغلى كل غالي ..



علي يا أغلى كل غالي - يا يا أول او تالي
علي او بس إنت تحلالي

همت والشوگ جنني يبو السبطين - يا داحي الباب مو وحدة إلك بابين
باب ابمعركة خيبر - او باب الجنة يا حيدر
غرام الروح نساني او ذكرت إثنين - بعد لك باب ناسيها يا ضي العين
تعال اگبالي وإتصور - أراويلك عشگ أخضر
إلك يا العايش اببالي - إفتحت لك باب دلالي
علي او بس إنت تحلالي

إلك تاريخ عن خيبر يا ليث الغاب - بطل معروف وابچفك قلعت الباب
قلعتها وإنصرت دينك - يا حيدر عاشت ايمينك
اعلى راس الموت تتخطى او حسبت احساب - غضب فتاك يا نازل على الأحزاب
بطل ثبتت موازينك - إلك شهدت ميادينك
علي او راسك يظل عالي - علي او بالشدة ما تبالي
علي او بس إنت تحلالي

مثل هالحال يا حيدر حصل وياي - أشوف جيوش مجموعة ابضمير احشاي
صحت ويلاه وا لهفي - غرامي بالگلب مخفي
لگيت الباب مسدودة وأدور هواي - قلعت الباب من گلبي اعزم يمناي
قلع باب الگلب چفي - او نهدتك فوت يا ولفي
يمن وجهك تهيالي - شمس وتغازل هلالي
علي او بس إنت تحلالي

يبو السبطين بالمحشر إلك اسرار - تگف عالباب بالجنة يا حامي الجار
دخول الجنة يتقدر - إلك يا ساقي الكوثر
نشوف الباب مفتاحه ابيمينك صار - إلتمسك بيك تشفع له يا بو الأطهار
إلك رب العرش قرر - شفيع ابساعة المحشر
وأقدم صفحة أعمالي - إلك يا كعبة آمالي
علي او بس إنت تحلالي

دخلت ابباب دلالي او سكنت الروح - أجيك اهناك وأتعنى ابجفن مشبوح
وأگلك يا علي إنت - دخلت ابگلبي وسكنته
أريد اليوم تشفع لي او تگلي روح - إلك هالباب للجنة او درب مفتوح
أمل عندي او تأملته - أحقق هالأمل يمتى
عبير الفرحة يصفى لي - وأنول ابچفي سلسالي
علي او بس إنت تحلالي

وعد موعود عالكوثر وعدنه هناك - ابرحيق الكاس تروينه او تمد يمناك
إله إلي رفع مجدك - خلق جنة عدن لأجلك
سحر معناك هيمني سحر معناك - إلك أوصاف ما واحد حملها اوياك
علي او بس النبي ايشبهك - علي او لمن شفت وجهك
وجه طه تراوالي - وأسمعه يهتف ابدالي
علي او بس إنت تحلالي
..........................................................................
بسم الله الرحمن الرحيم

اللهم صل على محمد وال محمد

.. يا من ردت ..



يا من ردت رب العرش يقبل صيامك - من واجبك تحضر حفل مولد إمامك
تحيي المحافل - فرحة او هلاهل
من واجبك تحضر حفل مولد إمامك

هذا الشهر شهر الأجر شهر السعادة - أنفاسك اتسبح إلك نومك عبادة
كل صايم ابهذا الشهر حقق مراده - ابصومه او صلاته اتفتحت زهرة وداده
ويصادف الخامس عشر يوم الولادة - مولد سليل المصطفى او تاج السيادة
فرحتنه نرسمها إلك من هالقصيدة - الكل أريدك تستمع وتگلي عيده
رغم العواذل - فرحة او هلاهل
من واجبك تحضر حفل مولد إمامك

ما نمدح ابهذا الشعر غير الأماجد - ابمدح الحسن يحلى النظم تحلى القصايد
من عندها ناخذ معرفة او نكسب فوايد - فن القوافي من ضمن نهج العقايد
كل بيت بالجنة قصر والباري شاهد - كلنه اننتشارك بالأجر مبدئنه واحد
فايز يمن تمدح أهل بيت الرسالة - ابكل بيت إلك بيت ابأمر رب الجلالة
وبگلبي شايل - فرحة او هلاهل
من واجبك تحضر حفل مولد إمامك

شيعي او موالي او حققت كل أمنياتك - تمدح أهل بيت النبي ابسيرة حياتك
اتأدي الخمس ما تمتنع تدفع زكاتك - فرض الصيام اتمارسه او تحفظ صلاتك
ما دام هذه يا المحب صارت صفاتك - إخذ البشارة او بالحشر ضامن نجاتك
وابمحفل إبن المصطفى تحضر وأبشرك - يوم الحشر راعي الحفل لا شك يحضرك
محفلنه شامل - فرحة او هلاهل
من واجبك تحضر حفل مولد إمامك

شيعة او تبعنه المجتبى ابعلم او دراية - تابعنه دستور الحسن من البداية
هذا الحسن منبع كرم بيه الكفاية - من مولده الطاهر بزغ نور الهداية
قائدنه وإحنه شيعته ابحكم الوصاية - عن فاضل الطينة إخذ معنى الرواية
شيعتنه نفرح بالفرح ويانه تفرح - او من نحزن اويانه ابحزن مدمعها يسفح
هالليلة حاصل - فرحة او هلاهل
من واجبك تحضر حفل مولد إمامك

ابحكم الرواية إلي مضت جينه او حضرنه - نعقد حفل للمجتبى او بيه إبتشرنه
ابلحن القوافي الزاهرة إنرتل شعرنه - وابدافع الحب والوفى انواصل سهرنه
ابحب الرسول او عترته الباري أمرنه - او رب الجلالة ابرحمته ايضاعف أجرنه
هالليلة يا محلى السهر والحب دعانه - إنردد أناشيد الوفى او تسمع صدانه
ابكل المنازل - فرحة او هلاهل
من واجبك تحضر حفل مولد إمامك

كل العوالم بالفرح باتت مزهرة - تتوارد انجوم السمة من كل مجرة
تقدم تهاني للنبي او نزلت تبشره - كل بقعة من هاي الأرض فرحة او مسرة
وإحنه اعلى هاي الشاكلة للحب نظهره - محفل سليل المصطفى او واجب نحضره
انهني الرسول او حيدرة او گلب الوديعة - والحمد لله والشكر أصبحنه شيعة
شيعة او نواصل - فرحة او هلاهل
من واجبك تحضر حفل مولد إمامك
...........................................................................
بسم الله الرحمن الرحيم

اللهم صل على محمد وال محمد

.. يا صاحِبَ الزَمانِ ..



يا صاحِبَ الزَمانِ - لَبَيكَ يا إمامي
مَتى سَتَظهَر - اللهُ أكبَر
لَبَيكَ يا إمامي

من هالزمن يا غايب - شفنه اشكثر عجايب
نتأمل البشارة - يا وارث الغوال
من كل كتر نطالع - ولجيتك نراقب
وإحنه ابأمل قدومك - يا صاحب المناقب
وَنَحسِبُ الثَواني - يا صاحِبَ الزَمانِ
أمرٌ تَقَرَر - اللهُ أكبَر
لَبَيكَ يا إمامي

يا نفحة النسايم - نحسب إلك علايم
جور الأرض ملوها - وإنتشرت المظالم
يمى الفرج حلوله - يا منبع المكارم
يمتى السعد نشوفه - وليمنتك نسالم
طالَ بِكَ المَغيبُ - يا أيُها الحَبيبُ
هَجرٌ تَقَدَر - اللهُ أكبَر
لَبَيكَ يا إمامي

يا خاتم الإمامة - ظلت بعد علامة
من الغرب فجرنه - يطلع عكس نظامه
او ليل الظلم نشوف - يتلاشى كل ظلامه
ذاك الوكت يبين - كل عاشگ او غرامه
يا أوحَدَ الجَمالِ - وَطَيِبَ الخِصالِ
وَجهٌ تَنَوَر - اللهُ أكبَر
لَبَيكَ يا إمامي

سائل لون سئلنه - وليا هدف وصلنه
يبن الحسن نجاوب - من منطلق عدلنه
انگله الحفل ننصبه - للمنتظر أملنه
او من تظهر ابظهورك - يكمل بدر حفلنه
يا آخِرَ الكَواكِب - يا إبنَ الشِهابِ الثاقِب
لَم يَبقى مُنكَر - اللهُ أكبَر
لَبَيكَ يا إمامي

يوم الذي تجينه - ايتم الفرح علينه
تحسبنه من جنودك - وابكل عهد وفينه
وعلى العهد بعدنه - يا المهدي ما نسينه
محفل فرح نعيده - بالمولد إبتدينه
نورُكَ لا يُضاهى - وَجهُكَ وَجهُ طهَ
بَل أنتَ حَيدَر - اللهُ أكبَر
لَبَيكَ يا إمامي
.......................................................[/center][/b]

يسلمووو خيتووه

في مزان حسناااااااااااااتك

مشكورة وماقصرتي تسلخمة يدك

عوووافي ع الطرح
/
كل الود